2021-mi inuusuttunut ilinniarfiit
Saqqummersitami uani Kalaallit Nunaanni inuusuttunut ilinniarfinni ilinniartut kisimik sammineqarput. Nunani allani inuusuttunut ilinniarfinni ilinniartut Kalaallit Nunaanneersut Naatsorsueqqissaartarfiup Kisitsisaataasiviani aaneqarsinnaapput
2021-mi 723-it inuusuttunut ilinniarfimmik naammassinnissimapput
2021-mi Kalaallit Nunaanni 723-inik amerlassusillit inuusuttunut ilinniarfimmik naammassinnissimapput. Ukiuni tulleriinni inuusuttunut ilinniakkamik nammassinnittartut amerliartorusaarsimapput, 2016-imilu naammassinnissimasut 803-ullutik amerlanerpaasimapput. Taamanili ukiumut naammassinnittartut amerlassusaat 10 pct.-inik appariarsimavoq, kisiannili 2005-imiit 82 pct.-imik qaffassimalluni.
Titartagaq 1. 2003-miit 2021-mut Kalaallit Nunaanni inuusuttunut ilinniarfimmik naammassinnissimasut
Najoqqutaq: Naatsorsueqqissaartarfik – Kisitsisaataasivimmi kisitsisit takukkit (https://bank.stat.gl/UDNISC11D).
2021-mi Kalaallit Nunaanni ilinniarnertuunngorniarnermik naammassinnissimasut 294-iupput, ukiup siuliani 281-iusiusut. 2005-imut sanilliullugu ilinniarnertuunngorniarnermik naammassinnittarnerit amerlassusaasa marloriaat sinnersimavaat.
Inuussutissarsiornermi ilinniakkamik naammassinnissimasut amerlassusaat ukiup siuliani 380-iusimasut 429-nut amerleriarsimapput, qaffariaat 13 pct.-iulluni.
2.055-it inuusuttunut ilinniarfinni ilinniakkamik ingerlatsipput
2021-mi Kalaallit Nunaanni inuusuttunut ilinniarfinni ilinniakkamik ingerlatsisut 2.055-inik amerlassuseqarput. Tamanna inuusuttunut ilinniakkani inuussutissarsiornermilu ilinniakkani ukiup siulianut sanilliullugu 4 pct.-inik appariarneruvoq. 2011-miilli ilinniartut amerlassusaat 398-inik ikileriarsimapput, appariaat 16 pct.-iulluni.
1.193-it inuusuttunut ilinniarfinni ilinniakkamik aallartitsisimapput
2021-mi 1.193-inik amerlassusillit inuusuttunut ilinniarfinni ilinniakkanik aallartitsisimapput, tamannalu 2014-imut sanilliullugu 15 pct.-inik appariarneruvoq, tassani inuusuttunut ilinniakkamik aallartitsisimasut amerlanerpaasimapput. Ilinniartuunngorniarnernik aallartitsisimasut 2014-imi amerlanerpaasipput, piffissami 2003-miit 2021-mut inuussutissarsiornermi ilinniakkamik aallartitsisimasut 2016-imi amerlanerpaasut.
Agguaqatigiissillugu 20-nik ukiullit ilinniarnertuunngorniarnermik aallartitsisarput, inuussutissarsiornermilu ilinniakkamik aallartitsisartut agguaqatigiissillugu 27-nik ukioqartartut.
Titartagaq 2. 2003-miit 2021-mut Kalaallit Nunaanni ilinniakkanik aallartitsinerit
Najoqqutaq: Naatsorsueqqissaartarfik – Kisitsisaataasivimmi kisitsisit takukkit (https://bank.stat.gl/UDNISC11A).
Eqikkaaneq
Tabel 1. 2017-imiit 2021-mut inuusuttunut ilinniarfinni ilinniartut ilinniakkap suussusaa killiffillu malillugit
Najoqqutaq: Naatsorsueqqissaartarfik – Kisitsisaataasivimmi kisitsisit takukkit (https://bank.stat.gl/UDNISC11A, https://bank.stat.gl/UDNISC11B, https://bank.stat.gl/UDNISC11D).